अहमदाबाद प्रतिनिधी :
दि. १२ जून २०२५
आज (१२ जून) दुपारी अहमदाबादमध्ये एअर इंडियाचे प्रवासी विमान बोईंग ड्रीमलाईनर 787 क्रॅश झाले. या विमानात 242 प्रवासी होते, या घटनेचे धक्कादायक व्हिडीओ देखील पुढे येत आहेत. विमान सरदार वल्लभभाई पटेल आंतरराष्ट्रीय विमानतळावरून लंडनला जात असताना ही दुर्घटना घडली. या विमानात प्रवास करत असलेल्यांची नावे अजून पुढे आली नसून बचावकार्य राबवले जात आहे. विमानाचे अवशेष मेघानीनगर परिसरात आढळले आहेत. आग आणि धुरांचा लोट दूरपर्यंत दिसत आहे.
विमानाने सरदार वल्लभभाई पटेल आंतरराष्ट्रीय विमानतळावरून उड्डाण केले होते. या अपघातात जखमी झालेल्यांना सरकारी रूग्णालयात दाखल केले जात आहे. याच पार्श्वभूमीवर रूग्णालयातील डॉक्टरांच्या सुट्टया रद्द करण्यात आल्याचीही माहिती मिळत आहे. तात्काळ रूग्णालयात पोहोचण्याचे आदेश लागू करण्यात आले आहेत. सरकारी रूग्णालयात एकच धावपळ सुरू असल्याचेही एक चित्र बघायला मिळतं.
विमान टेकऑफ झाल्यानंतर काही मिनिटात हा अपघात झाल्याचे सांगितले जात आहे. या अपघातानंतर विमानाचा जवळपास संपूर्ण भाग जळाला आहे. हेच नाही तर विमान ज्या इमारतीवर धडकले, त्या इमारतीचेही मोठे नुकसान झाल्याची माहिती मिळत आहे. मिळालेल्या माहितीनुसार, हे विमान अहमदाबादहून लंडनकडे जात होते. या विमानात गुजरातचे माजी मुख्यमंत्री विजय रूपाणी हे देखील होते असं समजलं आहे. त्यांचा सीट क्रमांक 2D होता.
अपघातानंतर एक भीतीचे वातावरण परिसरात बघायला मिळत आहे. मात्र, हा अपघात नेमका कसा झाला, याबद्दलची माहिती ही अजून मिळू शकली नाहीये. आगीवर नियंत्रण मिळवण्याचे काम सुरू आहे. जखमींना रूग्णालयात दाखल केले जात आहे. उड्डाण घेतल्यानंतर काही मिनिटांमध्ये हा अपघात झाल्याचेही कळत आहे. सोशल मीडियावर या अपघात अपघाताचे अनेक फोटो आणि व्हिडीओ देखील व्हायरल होताना दिसत आहेत.
