मुंबई प्रतिनिधी :
दि. १४ जुलै २०२५
राष्ट्रपती द्रौपदी मुर्मू यांनी ज्येष्ठ वकील उज्ज्वल देवराव निकम, केरळमधील ज्येष्ठ सामाजिक कार्यकर्ते आणि शिक्षणतज्ज्ञ सी. सदानंदन मस्ते, माजी परराष्ट्र सचिव हर्षवर्धन श्रृंगला आणि प्रख्यात इतिहासकार आणि शिक्षणतज्ज्ञ मीनाक्षी जैन यांना राज्यसभेसाठी नामनिर्देशित केले आहे. राष्ट्रपती द्रौपदी मुर्मू यांनी राज्यसभेसाठी चार सदस्यांची निवड केली आहे.
उज्ज्वल देवराव निकम हे प्रसिद्ध वकील आहेत. त्यांनी अनेक महत्त्वाच्या खटल्यांमध्ये सरकारचे प्रतिनिधित्व केले आहे. काही दिवसांपूर्वीच उज्वल निकम यांनी लोकसभेची निवडणूक लढवली होती. मात्र, त्यांना पराभव स्वीकारावा लागला. त्यांनी ही निवडणूक भाजपाकडून लढवली होती. उज्ज्वल निकम यांच्या नावाची आता घोषणा करण्यात आली असून ते राज्यसभेतून खासदार होणार आहेत.
देशातील प्रसिद्ध वकील उज्ज्वल निकम हे राज्यसभेतून खासदार होणार आहेत. दहशतवादी अजमल कसाबविरुद्धचा खटला लढवण्यासाठी ते ओळखले जातात. मुंबई उत्तर मध्य मतदारसंघातून काँग्रेसच्या उमेदवार वर्षा गायकवाड यांच्या विरोधात उज्ज्वल निकम यांनी लोकसभेची निवडणूक लढवली होती. जोरदार प्रचार करतानाही उज्ज्वल निकम हे दिसले होते. मात्र, त्यांना पराभव स्वीकारावा लागला.
उज्ज्वल निकम यांचा जन्म जळगाव येथे झाला. त्यांचे वडील देवराव माधवराव निकम हे देखील बॅरिस्टर होते. त्यांनी विज्ञान विषयात बॅचलर पदवी प्राप्त केली आणि नंतर जळगाव येथील एस.एस. मणियार लॉ कॉलेजमधून कायद्याचे शिक्षण घेतले. २६/११ च्या दहशतवादी हल्ल्याव्यतिरिक्त, उज्ज्वल निकम यांनी टी-सीरीजचे संस्थापक गुलशन कुमार यांची हत्या, भाजप नेते प्रमोद महाजन यांची हत्या आणि मुंबई सामूहिक बलात्कार यासारखे हायप्रोफाईल खटले देखील लढले आहेत. उज्ज्वल निकम यांच्या सोबतच शिक्षणतज्ज्ञ सी. सदानंदन मस्ते, माजी परराष्ट्र सचिव हर्षवर्धन श्रृंगला आणि प्रख्यात इतिहासकार आणि शिक्षणतज्ज्ञ मीनाक्षी जैन यांच्याही नावाची घोषणा यावेळी करण्यात आली.
