मुंबई प्रतिनिधी
दि. ०८ ऑगस्ट २०२५
भारतीय टेलिव्हिजनच्या इतिहासात अजरामर ठरलेल्या ‘क्योंकि सास भी कभी बहू थी’ या मालिकेचं नव्याने पुनरागमन झालं असून, प्रेक्षकांचा प्रतिसाद पाहता ही मालिका पुन्हा एकदा लोकप्रियतेच्या शिखरावर पोहोचली आहे. पहिल्याच आठवड्यात या मालिकेने टीआरपीचे सारे रेकॉर्ड मोडले आहेत. देशभरातून सुमारे १.६५ अब्ज मिनिटं प्रेक्षकांनी ही मालिका पाहिली असल्याचं वाहिनीने जाहीर केलं आहे.
टीव्ही आणि OTT वर घवघवीत यश
मालिकेच्या पहिल्या टिझरला मिळालेला प्रतिसाद पाहता नव्या पर्वाबद्दलची उत्सुकता आधीपासूनच होती. मालिकेच्या पहिल्या चार दिवसांतच टीव्हीवर सुमारे ३ कोटी प्रेक्षकांनी मालिकेचा आनंद घेतला असून, OTT प्लॅटफॉर्मवरही ही मालिका मोठ्या प्रमाणात पाहिली जात आहे. जुन्या आठवणींना उजाळा देतानाच ही मालिका नव्या पिढीलाही भुरळ घालत आहे.
स्मृती इराणींच्या मानधनाची चर्चा
या मालिकेच्या नव्या पर्वात तुलसीच्या भूमिकेत पुन्हा एकदा स्मृती इराणी प्रेक्षकांच्या भेटीला आल्या आहेत. सध्या केंद्र सरकारात मंत्रीपद भूषवणाऱ्या स्मृती इराणी यांचं छोट्या पडद्यावर पुनरागमन हे मोठं आकर्षण ठरतं आहे. त्यांच्या मानधनाबाबत अनेक चर्चांना उधाण आलं असून, काही रिपोर्ट्सनुसार त्या एका एपिसोडसाठी १४ लाख रुपयांचं मानधन घेत आहेत.
तब्बल १५० एपिसोड्स, एकूण मानधन २० कोटींपेक्षा अधिक
या नव्या पर्वात एकूण १५० एपिसोड्स प्रसारित होणार असल्याचं बोललं जात आहे. प्रत्येक एपिसोडसाठी १४ लाख मिळाल्यास स्मृती इराणी यांचं एकूण मानधन २० कोटींपेक्षा अधिक असेल. ही आकडेवारी अद्याप अधिकृतरीत्या जाहीर करण्यात आलेली नसली, तरीही मनोरंजनसृष्टीत याची चांगलीच चर्चा रंगली आहे.
दीपिकालाही मागे टाकलं!
या मानधनाच्या आकडेवारीनं स्मृती इराणी यांनी बॉलीवूड अभिनेत्री दीपिका पादुकोणलाही मागे टाकलं आहे. दीपिकाने ‘पठाण’साठी अंदाजे १५ कोटी रुपये घेतले होते, तर स्मृती यांचं एकूण मानधन त्यापेक्षा लक्षणीयरीत्या अधिक ठरणार आहे.
यामुळे स्मृती इराणी या सध्या टीव्ही इंडस्ट्रीमधील सर्वाधिक मानधन घेणाऱ्या अभिनेत्री ठरल्या आहेत. अभिनयापासून राजकारणात आणि पुन्हा अभिनयाकडे असा त्यांचा प्रवास प्रेक्षकांसाठी उत्सुकतेचा विषय ठरत आहे.
