मुंबई प्रतिनिधी :
दि.२८ ऑगस्ट २०२५:
पुणे जिल्ह्यातील इंदापूर तालुक्यात उभारण्यात येणाऱ्या प्रस्तावित जंक्शन एमआयडीसीसाठी आवश्यक असलेल्या अतिरिक्त जमिनीबाबतचा प्रस्ताव उद्योग विभागाने लवकरात लवकर महसूल विभागाकडे पाठवावा, अशा सूचना महसूलमंत्री चंद्रशेखर बावनकुळे यांनी दिल्या. यावेळी कृषीमंत्री दत्तात्रय भरणे यांनी देखील, शेती महामंडळाच्या ताब्यातील १००० एकरहून अधिक जागा या प्रकल्पासाठी विनामूल्य उपलब्ध करून देण्याची मागणी केली.
या मुद्द्यावर मंत्रालयात एक महत्त्वपूर्ण बैठक पार पडली. महसूलमंत्री चंद्रशेखर बावनकुळे यांनी सांगितले की, इंदापूर तालुक्यातील वालचंदनगर परिसरात नवे औद्योगिक क्षेत्र उभारण्यासाठी मौजे जंक्शन, भरणेवाडी, अंथुर्णे आणि लासुर्णे या गावांतील तसेच इतर लागणाऱ्या जमिनींसह सविस्तर प्रस्ताव तयार करून उद्योग विभागामार्फत महसूल विभागाकडे सादर करण्यात यावा. हा प्रस्ताव मंत्रीमंडळासमोर मांडण्यात येणार असल्याची माहिती त्यांनी दिली.
कृषीमंत्री दत्तात्रय भरणे यांनी यावेळी सांगितले की, या प्रस्तावित एमआयडीसीसाठी सध्या अस्तित्वात असलेल्या जमिनीत भर घालण्यासाठी शेती महामंडळाच्या मालकीचे सलग १००० एकर क्षेत्र विनामूल्य उपलब्ध करून देण्यात यावे. या औद्योगिक प्रकल्पामुळे इंदापूर तालुक्यात विविध उद्योगांची स्थापना होणार असून, स्थानिक तरुणांना मोठ्या प्रमाणात रोजगार उपलब्ध होईल. हे औद्योगिक क्षेत्र तालुक्याच्या सर्वांगीण आर्थिक आणि सामाजिक विकासाला चालना देणारे ठरेल, असेही त्यांनी नमूद केले.
या बैठकीला कृषीमंत्री भरणे यांच्यासह पणनमंत्री जयकुमार रावल, राज्यमंत्री योगेश कदम, महाराष्ट्र राज्य शेती महामंडळाच्या व्यवस्थापकीय संचालक मंजिरी मनोलकर, पुण्याचे जिल्हाधिकारी जितेंद्र डुडी (व्हीसीद्वारे), तसेच एमआयडीसीचे उपमुख्य कार्यकारी अधिकारी संतोष भिसे व अन्य वरिष्ठ अधिकारी उपस्थित होते.
