इंदापूर प्रतिनिधी :
दि. २६ नोव्हेंबर २०२५
येत्या २ डिसेंबर रोजी राज्यात नगरपरिषदांच्या निवडणुका संपन्न होत आहेत. इंदापुरातही या निवडणुकीचे जोरदार वारे वाहत आहेत. निवडणुकीची तारीख जसजशी जवळ येते आहे तसतशी उत्साह आणि उत्कंठा शिगेला पोहोचत आहेत.
येथे नगराध्यक्षपदासाठी भरत सुरेशदास शहा हे निवडणुकीच्या रिंगणात उतरले आहेत. त्यांचा प्रचार मोठ्या धुमधडाक्यात सुरू आहे. जनसामान्यांचा पाठिंबा आणि प्रचारात त्यांचा उत्स्फूर्त सहभाग शहा यांचे पारडे दिवसागणिक जड करतो आहे. याशिवाय राज्याचे कृषीमंत्री दत्तात्रय भरणे हेही या प्रचारमोहिमेत सक्रियपणे उतरले आहेत हे विशेष! भरणे यांच्या प्रचारसभांना होणारी वाढती गर्दी बरेच काही सांगून जाते आहे. शिवाय त्यांच्या पत्नी सौ. सारिका दत्तात्रय भरणे याही शहा यांच्या प्रचारात सामील झाल्या आहेत. त्यांना विशेषतः महिलांचा मिळणारा प्रतिसाद लक्षणीय आहे.
सदर प्रतिनिधीने इंदापूर शहरातील जनतेशी संपर्क साधला असता शहा यांच्याबद्दल अतिशय सकारात्मक प्रतिसाद मिळाला. शहा यांची जनसेवेची वृत्ती, त्यांचे जनतेशी असलेले जवळचे नाते, त्यांची कर्तव्यदक्षता याबाबत लोक भरभरून बोलले. आम्ही त्यांनाच मत देणार असाच एकंदरीत सार्यांचा सूर होता.
या सर्व गोष्टी विचारात घेता दर दिवशी भरत सुरेशदास शहा यांचे पारडे जड होत असल्याचे प्रकर्षाने जाणवते. नगराध्यक्षपदाची माळ किती मताधिक्याने त्यांच्या गळ्यात पडते हे पाहणे औत्सुक्याचे ठरेल असेच येथील वातावरण पाहता जाणवते आहे.
