पुणे प्रतिनिधी :
दि. २७ नोव्हेंबर २०२५
येरवड्यात सायंकाळच्या सुमारास घडलेल्या एका हृदयस्पर्शी प्रसंगाने पुणेकर भारावून गेले. रस्त्यावर जीव मावळत असताना आजूबाजूची गर्दी फक्त पाहत उभी होती. मदतीची हिंमत कुणी दाखवली नाही. पण त्या क्षणी पोलीस मुख्यालयातील शिपाई सुशांत काशिनाथ रणवरे हे देवदूतासारखे पुढे सरसावले आणि एका अनोळखी व्यक्तीचे प्राण वाचवले.
मृत्यूच्या छायेतून बाहेर काढलं
गोल्फ क्लब चौकाजवळील बसथांब्यावर 47 वर्षीय संदीप सावंत हे अचानक छातीत तीव्र वेदना झाल्याने जमिनीवर कोसळले. काही क्षणांतच त्यांचा श्वासोच्छ्वास मंदावू लागला. हे सर्व रणवरे यांच्या नजरेस पडताच त्यांनी क्षणाचाही विलंब न करता गाडी रस्त्यात थांबवली आणि गर्दी चिरत ते सावंत यांच्या जवळ पोहोचले.
परिस्थिती गंभीर असल्याचे जाणवताच रणवरे यांनी तत्काळ सीपीआर देण्यास सुरुवात केली. योग्य पद्धतीने छातीवर दाब देत त्यांनी सावंत यांचा श्वास परत सुरू करण्याचा प्रयत्न अखंड सुरू ठेवला.
काही मिनिटांनी जवळच्याच एका नागरिकाच्या कारमध्ये त्यांना बसवून रणवरे यांनी स्वतःच गुंजन चौकातील शहा हॉस्पिटलमध्ये दाखल केले. प्राथमिक उपचारानंतर त्यांना पुढील उपचारांसाठी डी. वाय. पाटील हॉस्पिटलला हलवण्यात आले. योग्य वेळी मिळालेल्या उपचारांमुळे सावंत यांचे प्राण वाचले, असे डॉक्टरांनी स्पष्ट केले.
धाडस आणि माणुसकीला सलाम
या धावपळीत रणवरे यांनी सावंत यांच्या परिवारालाही तात्काळ कळवून त्यांना हॉस्पिटलमध्ये पोहोचण्यास मदत केली. घटनेनंतर स्थानिक नागरिकांनी तसेच पोलीस दलाने रणवरे यांच्या धाडसाचे, संवेदनशीलतेचे आणि माणुसकीचे मनापासून कौतुक केले.
गर्दीत शेकडो लोक असतानाही कोणी मदतीसाठी पुढे न आलं; पण रणवरे यांनी दाखवलेल्या धडाडीमुळे एका घराचा आधार वाचला, एका पत्नीला तिचा पती आणि मुलांना त्यांचे वडील पुन्हा मिळाले—हेच त्यांच्या कार्याचे खरे मूल्य आहे.
