डीडी न्यूज क्रीडा प्रतिनिधी :
दि. २७ नोव्हेंबर २०२५
भारतीय कसोटी संघाची कामगिरी अलीकडे बऱ्यापैकी निराशाजनक ठरत आहे. टीम इंडियाने आपल्या घरच्या मैदानावर आणखी एक कसोटी मालिका गमावली असून, दक्षिण आफ्रिकेने सलग दोन विजय मिळवत भारताचा व्हाईटवॉश केला आहे. यामुळे देशभरातील क्रिकेटप्रेमी नाराज आहेत आणि प्रशिक्षक गौतम गंभीर यांच्यावर टीकेची झोड उठली आहे. या पार्श्वभूमीवर गंभीरचा एक फोटो सोशल मीडियावर धडाक्यात व्हायरल होत असून, त्यात तो पराभवानंतर रडल्याचा दावा केला जात आहे.
@jod_insane या X हँडलवरून गंभीरचा मैदानावरील एक फोटो शेअर करण्यात आला. त्या चित्रात तो मान खाली घालून चालताना दिसत आहे. काही चाहत्यांनी या फोटोत गंभीर डोळे पुसताना किंवा अश्रू लपवत असल्याची शक्यता व्यक्त केली आहे. मात्र फोटोज थोडे धूसर असल्याने तो प्रत्यक्षात रडला की नाही, हे निश्चित म्हणता येत नाही. तरीही त्याच्या चेहऱ्यावर दिसणारी निराशा आणि ओढलेपणा पाहून पराभवाचा परिणाम त्याच्यावर खोलवर झाल्याचं जाणवतं.
गंभीरवर टीकेची झोड
गौतम गंभीर यांनी प्रशिक्षक पद स्वीकारल्यानंतर भारताने घरच्या मैदानावर सलग पाच कसोटी सामन्यांत पराभव स्विकारला आहे. दोन्ही मालिका व्हाईटवॉश झाल्या—पहिली न्यूझीलंडकडून ३-० आणि आता दक्षिण आफ्रिकेकडून २-०. त्यामुळे या निराशाजनक कामगिरीसाठी गंभीर जबाबदार असल्याची टीका केली जात आहे.
यामुळे संतापलेल्या चाहत्यांनी सोशल मीडियावर त्यांना जोरदार ट्रोल करायला सुरुवात केली आहे. तसेच पुन्हा एकदा WTC फायनलचं स्वप्न हातातून निसटेल, अशी भीती फॅन्स व्यक्त करत आहेत.
