लखनऊ प्रतिनिधी :
दि. २९ नोव्हेंबर २०२५
उत्तर प्रदेशातील बरेली येथे भावाच्या खुनानंतर तब्बल ३६ वर्षे पोलिसांना चकवणारा प्रदीप सक्सेना शेवटी पोलिसांच्या तावडीत सापडला. उच्च न्यायालयाच्या आदेशानंतर पोलिसांनी शोधमोहीम सुरू केली आणि सलग तपासानंतर प्रदीपचा मागोवा घेण्यात यश मिळाले. १९८७ मध्ये त्याने आपल्या भाऊ संजीव सक्सेनाची हत्या केली होती. या गुन्ह्यात त्याला जन्मठेपेची शिक्षा सुनावण्यात आली होती. १९८९ मध्ये पॅरोलवर बाहेर आल्यानंतर तो फरार झाला आणि त्यानंतर कधीच सापडला नव्हता. अखेर मुरादाबादमध्ये त्याला अटक करण्यात आली असून ७० वर्षांच्या प्रदीपची पुन्हा तुरुंगात रवानगी झाली आहे.
गुन्ह्यानंतर प्रदीप आणि त्याच्या कुटुंबाने गाव कायमचे सोडले. प्रदीप सतत ठिकाणे बदलत राहिला. काही काळ त्याने मुरादाबादच्या ट्रान्सपोर्ट नगरात हेल्पर आणि नंतर ट्रक चालक म्हणून काम केले. त्याच काळात त्याची एका मुस्लिम विधवेशी ओळख झाली. त्याने धर्मांतर करून तिच्याशी निकाह केला आणि स्वतःचे नाव बदलून ‘अब्दुल रहीम’ असे ठेवले. तो इस्लाम नगरातील तुर्की इंटर कॉलेजजवळ वास्तव्य करू लागला.
आपली खरी ओळख लपवण्यासाठी त्याने दाढी वाढवून मुस्लिम व्यक्तीचा वेष धारण केला. नातेवाईकांशी सर्व संबंध तोडून टाकले. पॅरोल संपल्यानंतर न्यायालयाने त्याच्या जुन्या घरी अनेकवेळा समन्स पाठवले, नोटिसा बजावल्या, मात्र तो सापडत नव्हता. अखेर १६ ऑक्टोबर २०२५ रोजी उच्च न्यायालयाने चार आठवड्यांत त्याला अटक करून न्यायालयासमोर हजर करण्याचे आदेश दिले. त्यानंतर पोलिसांनी शोध तीव्र केला.
तपासादरम्यान पोलिसांना प्रदीपचा भाऊ सुरेश बाबू सापडला. सुरुवातीला तो काहीही माहिती देण्यास तयार नव्हता. परंतु चौकशीत त्याने अखेर प्रदीपबद्दलचे तपशील कबूल केले. प्रदीपने धर्मांतर केल्याचे आणि तो मुरादाबादमध्ये वाहनचालक म्हणून काम करीत असल्याचे त्याने सांगितले. यानंतर पोलिसांनी छापा मारून प्रदीपला अटक केली.
प्रदीपच्या अटकेनंतर त्याच्या परिसरात राहणारे लोक थक्क झाले. त्यांना त्याच्या भूतकाळाबद्दल काहीच कल्पना नव्हती. एक खुनी इतकी वर्षे त्यांच्या शेजारी राहत होता, हे कळताच ते अवाक झाले.
