मुंबई प्रतिनिधी :
दि. १७ फेब्रुवारी २०२६
माजी उपमुख्यमंत्री अजित पवार यांच्या अपघाती मृत्यूबाबत ज्येष्ठ नेते संजय राऊत यांनी गंभीर शंका व्यक्त केली आहे. हा अपघात संशयास्पद असल्याचे सांगत त्यांनी सखोल चौकशीची गरज अधोरेखित केली.
रोहित पवार यांनी या प्रकरणासंदर्भात दोन सादरीकरणे (प्रेझेंटेशन) सादर केली असून आणखी एक सादर करण्याची तयारी दर्शवली आहे. दरम्यान, अपघाताची चौकशी खासगी गुप्तहेर संस्थेमार्फत होण्याची शक्यता व्यक्त होत असून विमानातील ब्लॅक बॉक्स खराब झाल्याची माहिती समोर आली आहे.
राऊत म्हणाले की, रोहित पवार यांनी पाच दिवसांपूर्वीच शंका व्यक्त केली होती. कुटुंबीयांना सरकारी तपासावर विश्वास नसेल तर स्वतंत्र एजन्सीकडून सत्य शोधण्याचा प्रयत्न सकारात्मक दृष्टीने पाहिला पाहिजे.
याशिवाय, अजित पवार यांच्या मृत्यूपूर्वी काही महत्त्वाच्या फाईल्स पुन्हा उघडण्यात आल्याचा दावा करण्यात आला आहे. यात जरंडेश्वर साखर कारखान्याच्या कर्जप्रकरणाचा समावेश असल्याचे सांगितले जाते. केंद्रीय सहकार मंत्री अमित शहा यांनी ही फाईल बंद करण्यास नकार देत ती महाराष्ट्रात परत पाठवल्याचेही राऊत यांनी नमूद केले.
या घडामोडींनंतर भाजपकडून फाईल अद्याप बंद नसल्याचे संकेत मिळाल्याने अजित पवार यांनी राजकीय भूमिकेचा पुनर्विचार सुरू केला होता, अशी माहिती राऊत यांनी दिली. या दाव्यांमुळे अपघाताच्या पार्श्वभूमीवर नव्या चर्चांना तोंड फुटले आहे.
