दुकानांच्या वेळा वाढवून द्या. व्यापाऱ्यांवरील अन्याय आता पुणे शहर भाजप सहन करणार नाही

पुणे प्रतिनिधीः डीडी न्युज मराठी

दि. ०५ ऑगस्ट २०२१

सध्या ७ ते ४ या वेळेत दुकाने उघडायला परवानगी आहे. परंतु प्रत्यक्षात दुकाने सकाळी १० वाजता उघडली जातात व दुपारी ४ वाजता बंद होतात. म्हणजे फक्त सहा तासच व्यवसाय सुरू असतो. पूर्वी ९ वाजेपर्यंत दुकाने उघडी ठेवण्याची परवानगी होती. म्हणजेच सोमवार ते शुक्रवार रोज पाचच तास म्हणजेच आठवड्याचे ३० तास कमी झाले आहेत. त्यात शनिवार व रविवार पूर्ण बंद असल्याने प्रत्येकाचा व्यवसाय जवळजवळ ५ दिवस बंद आहे. या बंदमुळे व्यापाऱ्यांचे मोठ्या प्रमाणात आर्थिक नुकसान होत आहे. दुकाने बंद पण भाडे चालू आहे, वीजबिल चालू, बॅंकेचे हप्ते सुरूच आहेत. आणि त्याला शासनाकडून कुठल्याही प्रकारची सवलत अथवा सूट मिळालेली नाही. तसेच कर्मचाऱ्यांना पगार देखील द्यावा लागत आहे. त्याचप्रमाणे या दुकानांच्या कमी वेळेमुळे गर्दी जास्त होत असल्याने धावपळ मोठ्या प्रमाणात होते.

पुण्यातील व्यापाऱ्यांनी कायमच प्रशासनाला सहकार्य केले आहे आणि पुढे देखील ते सहकार्य तसेच राहिल.परंतु पुणे शहरातील कोरोनाचा बाधित दर कमी असून सुद्धा ग्रामीण भागातील दर कमी न झाल्याने शासनाने व्यापारी व ग्राहकांवर अन्याय केला आहे. त्यामुळे कोरोना नियमानुसार पुणे शहरातील नियम शिथिल करून दुकानांची वेळ सकाळी १० ते रात्री ८ वाजेपर्यंत करण्यात यावी तसेच शनिवारी देखील दुकाने चालू ठेवण्यासाठी परवानगी देण्यात यावी. अशी मागणी पुणे शहर भाजपच्या वतीने शहराध्यक्ष श्री.जगदीशजी मुळीक यांच्या वतीने प्रशासनाकडे करण्यात आली. विविध व्यापारी संघटना व पुणे व्यापारी महासंघ आणि इतर सर्व व्यापारी बंधू आणि भगिनींच्या आंदोलनाला पुणे शहर भारतीय जनता पार्टीचा संपूर्ण पाठिंबा राहणार असून व्यापाऱ्यांच्या या असंतोषाला पूर्णतः प्रशासन व शासन यंत्रणा जबाबदार असेल अशी भूमिका जगदीशजी मुळीक यांनी यावेळी स्पष्ट केली.