पुणे प्रतिनिधी
दि. १६ जून २०२२ : महाराष्ट्र लोकसेवा आयोगाने पदभरती परीक्षांची तयारी करणाऱ्या उमेदवारांच्या कमाल संधींबाबत मोठा निर्णय घेतला आहे. उमेदवारांच्या कमाल संधींची मर्यादा रद्द करून सर्व प्रवर्गातील विद्यार्थ्यांना मोठा दिलासा दिला आहे. आता पूर्वीप्रमाणेच उमेदवारांना प्रवर्गासाठी निश्चित केलेल्या वयोमर्यादेनुसार परीक्षा देण्याच्या कमाल संधी मिळणार आहेत. या निर्णयाचं विद्यार्थ्यांनी स्वागत केलं आहे.
आतापर्यंत वेगवेगळ्या प्रवर्गांसाठी MPSC च्या परीक्षा देण्याच्या कमाल संधींची संख्या वेगवेगळी होती. SC, ST, OBC, OPEN, मराठा अश्या प्रवर्गांनुसार वेगवेगळ्या मर्यादा होत्या. उदा. एका परीक्षार्थीने संगितले की मराठा समाजाला आत्तापर्यंत केवळ सहा संधी होत्या त्यामुळे त्यांच्यावर एक प्रकारचं दडपण असायचं. शिवाय जातिभेद केला जातोय, यांना संधी जास्त आणि आपल्याला कमी असा आकस मनात निर्माण झाला होता. परीक्षेला बसणार्या विविध प्रवर्गांमध्ये एक दुफळी निर्माण झाली होती. पण आता प्रत्येकाला जातीच्या वा प्रवर्गाच्या बंधनाशिवाय वयाच्या कमाल मर्यादेपर्यंत परीक्षा देता येणार आहे. या निर्णयाचे सर्व विद्यार्थ्यांनी स्वागत केले आहे.
जातीभेदाच्या भावनेमुळे जो रोष विद्यार्थ्यांमध्ये निर्माण झाला होता तोही आता नाहीसा झाला आहे अशी एक बोलकी प्रतिक्रिया एका विद्यार्थ्याने दिली. या निर्णयामुळे सर्वांना समान न्याय आणि संधी मिळाल्याची भावना सर्व विद्यार्थ्यांमध्ये दिसून येत आहे.