बारामती प्रतिनिधी :
दि. २९ नोव्हेंबर २०२५
सद्याच्या प्रचारात कामगिरीपेक्षा ‘पैसे घ्या, निधी मिळवा’ अशा पद्धतीची भाषा डोकावते आहे आणि ही लोकशाहीसाठी धोकादायक बाब आहे. ‘फक्त पैशाच्या बळावर निवडणुका जिंकण्याचा प्रयत्न करत असाल, तर त्यावर भाष्य न करणेच योग्य,’ असे म्हणत ज्येष्ठ नेता शरद पवार यांनी सत्ताधाऱ्यांना टोला लगावला.
बारामतीतील गोविंदबाग निवासस्थानी पवार पत्रकारांशी बोलत होते. “पूर्वी अनेक राष्ट्रीय नेत्यांनी स्थानिक निवडणुकांत अनावश्यक राजकारण न आणण्याची भूमिका ठेवली होती. पण यावेळी विविध गट–उपगट आणि अनपेक्षित आघाड्या तयार झाल्या आहेत. यावरून परस्परांमध्ये सामंजस्य नसल्याचे जाणवते. माझ्यासारखी मंडळी आता या निवडणुकांत पूर्वीइतकी सक्रिय राहत नाहीत. काहीच दिवसांत लोक आपला निकाल देणार आहेत,” असे ते म्हणाले.
आरक्षणाबाबत न्यायालयाची स्पष्ट भूमिका
ओबीसी आरक्षण मर्यादा ओलांडल्याच्या मुद्द्यावर सर्वोच्च न्यायालयात अंतिम सुनावणी सुरू असताना, पवार यांनी यावर प्रतिक्रिया देताना सांगितले, “या प्रकरणात सर्वोच्च न्यायालयाची भूमिका अत्यंत स्पष्ट आणि कठोर दिसते. दोन दिवसांत काय निकाल लागेल, हे सध्या सांगता येत नाही.”
कर्जवसुलीला दिलेली स्थगिती अपुरी
पूर आणि अतिवृष्टीमुळे काही ठिकाणी शेतीची जमीन वाहून गेली असून अनेकांची साधनेही नष्ट झाली आहेत. अशा परिस्थितीत राज्य सरकारने दिलेली एक वर्षाची कर्जवसुली स्थगिती पुरेशी नसल्याची नाराजी पवारांनी व्यक्त केली. “फक्त कर्जवसुली थांबवून उपयोग नाही; सरकारने थेट आर्थिक मदत जाहीर करायला हवी होती,” असे त्यांनी स्पष्ट केले.
